Bonos díes, bona xente.
” Seguimos col cielu nuble a la espera de les xelaes de mañana”
Alborecemos col cielu mui nuboso y precipitaciones febles con unes temperatures que tan alrodiu de los 6ºC, rexistrándose nel puirtu Payares -2,3ºC onde nieva seliquinamente.
Güei sedrá’l día más fríu de la selmana col cielu nuble tol día y dalguna precipitación feble ya dispersa que sedrá de nieve perriba de los 800m. L’aire sedrá sele ya variable y les temperatures descenderán entovía más.
El prósimu riscar tenderá a disminuir la nubosidá pa quedar el cielu poco nuboso o escampláu favoreciendo que se formen xelaes na mayor parte d’Asturies, amás de que surdan nublines ya borrinos no fonderu los valles con unes temperatures mínimes en bultable descensu. Yá pel día la llume del sol dirá caleciendo l’ambiente anque nun sedrá hasta primera hora de la tarde cuando temple l’ambiente. L’aire seguirá siendo sele ya varible.
El vienres, sábadu ya domingu vamos tener un tiempu mui asemeyáu col cielu poco nuboso en xeneral, sicasí pue surdir dalgún intervalu nuboso pero sin más consecuencies. L’ambiente seguirá siendo fríu por mor de les xelaes nuecherniegues que se darán en munches zones d’Asturies.
Pa más a llargu plazu torna’l vientu ábrigu que fadrá subir nidiamente les temperatures, esto sedría miércoles-xueves, el vienres pue cruzanos una vaguada atlántica que mos dexaría un nuevu refrescamientu y dalgo d’agua y yá cara a les navidaes podría tar cociéndose otra pero esto yá lu diremos viendo.
Que paséis un bon miércoles collacies ya collacios.
This work is licensed under a Creative Commons Attribution 4.0 International License.
