Dientro la campaña Macillavi pa los Yospla, na qu’Andecha Astur reclama’l barriu pa quien vive nelli, ayeri tuvo llugar una charra alderique qu’aconceyó a vecinos y xente interesao pol desendolcu caltenible de la ciudá

La Casa’l Chino acoyó ayeri un alderique nel que Llucía Fernández, comu representante d’Andecha Astur, Gelu García, autor de “la ciudad infartada” y Sergio Álvarez, presidente de l’Asociación de Vecinos Gigia – Cimavilla, punxeron sobre la mesa la situación del turismu, el problema de la xentrificación, la ineficiencia na xestión de les viviendes publiques y otres cuestiones venceyaes al barriu.

Cimavilla foi el primer barriu de Xixón en dar l’alarma, primero sobre’l so procesu de xentrificación, que foi camudando’l barriu de magar los años 90, y depués sobre la masificación turística.

Respectu al turismu, na so intervención, Llucía Fernández destacó que “Lo que tamos en contra ye del modelu de turistificación que se nos ta vendiendo, onde la implantación d’un turismu sobresovencionáu ta finando con tolos sectores productivos tradicionales, onde les necesidades de los visitantes tan perriba de les de los propios ciudadanos”. Nel mesmu sen, tanto Gelu García como Sergio Álvarez tuvieron d’alcuerdu na necesidá d’acabar coles viviendes d’usu turísticu.

“Les viviendes, por definición son pa vivir” puntualizó Llucía. “Nun pueden tener una función especulativa, muncho menos cuando existe, comu ocurre nesti momento, una necesidá social”.

En Cimavilla, una de ca diez viviendes, nun lo ye y los alquileres, aparte d’inasequibles, namás tan disponibles de xunu a setiembre. Na so intervención, Sergio describió con sinceridá rallando la crudeza la situación que se vive nel barriu, cómo se yos echa de los sos espacios, les dificultaes, por exemplu, pa dir a los institutos o al centru de Salú o comu inclusu llegaron a recibir menacies por defender a una muyer mayor a la que’l propietariu quería echar de la casa qu’arrendaba.

Gelu pel so lláu dio el marcu xeneral a la situación, falando del problema de la turistificación, les viviendes turístiques y la xestión de los espacios nes ciudades dende un puntu de vista mui xeneral y perbien informáu.

El tema de la vivienda social ye otru de los que se tocó na charra; proporcionalmente, Cimavilla cuenta con un bon parque de vivienda pública, pero la so deficiente xestión impide que s’aproveche afayaizamente “hai que tar continuamente enriba d’ellos, controlar, insistir, avisar de la necesidá d’una inversión inminente pa reparar pisos que van quedando vacios…”.

La meyora d’esta, la prohibición de les viviendes turístiques de manera retroactiva, l’incrementu progresivu de presión fiscal sobre pisos vacios o infrautilizaos, pudiendo llegase a la expropiación pa poner esos pisos a serviciu de la ciudadanía, o la necesidá de polítiques orientaes al barriu en llugar d’al turismu foron dalgunes de les vies propuestes pa meyorar la situación del barriu, insistiéndose na necesidá d’un plan estratéxicu pa Cimavilla nel que se potencien les empreses y actividades económiques tradicionales y de la implicación de les persones que viven nel barriu na toma de cualisquier decisión.

Darréu la charra tuvo llugar un interesante alderique nel que se puntualizaron munches de les cuestiones trataes na nella

This work is licensed under a Creative Commons Attribution 4.0 International License.