De illegalidá a illegalidá, los rapacinos de primaria del CP Virgen de las Mareas pasen de compartir espaciu con adultos d’una FP a facelo con reciella de cero a tres años
Les Conseyeríes d’Educación y de Derechos Sociales y Bienestar del Principáu d’Asturies avisen a escases selmanes de rematar l’añu qu’a la vuelta de les vacaciones de Navidá l’alumnáu y el profesoráu del CP Virgen de las Mareas tendrán de treslladase al vecín Xardín d’Infancia “Jardín de Cantos” (0-3 años) con quien tendrán de compartir espacios. L’avisu realízase de manera telefónica y ensin apenes esplicaciones a dambes direcciones, aprovechando la cercanía de les fiestes navidiegues col enfotu d’evitar, o siquier emenorgar, les protestes qu’entienden vaigan producise.
La Conseyería aduz que’l treslláu débese a que por llei nun pueden convivir nel mesmu espaciu los menores del colexu col alumnáu, mayor d’edá na mayoría de los casos, del CIFP del Deporte, magar esta situación lleva produciéndose 4 años, desque Conseyería decidió instalar la FP nes instalaciones del CP Virgen de las Mareas.
El casu ye que, pa nun infrinxir la norma, el departamentu de la señora Espina incumple otra, pues tampoco ye llegal que neños de Primaria compartan espaciu con ñácaros/es de 0-3 años ensin les pertinentes adaptaciones nes sos instalaciones, cosa que nin se realizó nin ta previsto se vaya a faer.
Amás, la calidá educativa de dambos centros va vese enforma amenorgada de perfacese esti cambéu plantegáu. La perda d’espacios pal alumnáu de 0-3 años que tendríen que dexar pa que s’instalara l’alumnáu de Primaria fadría que neños y neñes del primer ciclu d’infantil tuvieren que pasar 8 hores nel mesmu espaciu onde tienen de xugar, comer y echar el pigazu, y lloxísticamente sedría invidable poder llimpiar y desagafar l’espaciu dempués de les comíes tando ellos dientro. Amás, los ruios normales de les aules d’un centru de Primaria interferiríen nos ciclos vitales d’esti alumnáu tan pequenu, por nun falar de que’l procesu d’adaptación al espaciu y a les rutines que teníen adquirío sumiríen y habría qu’etamalos otra vez. Ye por ello que yá se tien constancia de la voluntá de delles families de sacar a los sos fíos y fíes del “Xardín de Cantos”.
El Colexu Publicu Virgen de las Mareas nel so nuevu allugamientu tamién perdería espacios: nun dispondría de biblioteca nin de pistes esportives, por poner solo dellos exemplos. Lo más firiente d’esta situación ye que, mientres la Conseyería merma l’espaciu amenorgando la calidá d’estos dos centros públicos, vemos como pela redolada gocien d’una salú impecable trés centros privaos-subvencionaos (los mal llamaos alcordaos), como son el Colegio Santo Ángel, Colegio Paula Frassinetti (Doroteas) y el Colegio Santo Tomás.
Dende SUATEA denuncien que con esta despreciable actuación de ¿improvisada? fusión, Educación y Derechos Sociales, van degradar les condiciones espacio-ambientales d’estos dos centros educativos públicos dexándolos arrequexaos hasta que muerran por inanición. Esto nun fai más que beneficiar a la escuela privada subvencionada, que bien podría tar agora mesmo estregándose les manos pensando yá n’abrir places 0-3 y nueves llinies en Primaria y Segunda Etapa d’Educación Infantil. Con esta forma d’actuar, la nuesa Conseyería retrátase claramente como favorecedora de la rede d’enseñanza concertada, mientres descaradamente pisa y fai de menos a la educación pública.
Dende SUATEA amuesen el so sofitu a les families, a los y les trabayadores y a los equipos directivos de dambos centros, amás d’esixi-y a la Conseyería d’Educación “que recapacite, que se siente a falar cola comunidá educativa y busque soluciones, qu’en sentíu contrariu del camín entamáu, dignifiquen y ameyoren la educación pública”.
Susana Sela
This work is licensed under a Creative Commons Attribution 4.0 International License.
