Dientro la coleición Cimbriella, dedicada a la sidre, la editorial Espublizastur vien d’asoleyar esta obra, que recueye los testimonios d’alrodiu cuarenta muyeres que dedicaron bona parte de la so vida a echar sidre
El vienres 20 d’avientu, a les seis de la tarde, el Muséu de la Sidre de Nava va acoyer la presentación del llibru “Muyeres qu’echen sidre”, una obra que rinde homenaxe a toles echaores que, dende tres d’una barra o enriba un escenariu, defenden y defendieron la manera tradicional d’echar la sidre col so facer diariu.
Esti llibru complementa l’anterior de la mesma coleición, “Muyeres del llagar”, que recueye los testimonios de mediu centenar de muyeres venceyaes a los llagares y ye una obra imprescindible pa pescanciar non solo la fuerte presencia de la muyer na cultura asturiana de la sidre, sinón tolo qu’arrodia l’echar la sidre.
El llibru cuenta coles imáxenes del fotógrafu Flavio Lorenzo y los testos de Susana Sela. Los dos cuntarán la experiencia d’investigación y documentación pa la realización de la obra na presentación, a la que tamién acudirá la editora Carme Pérez y el director del Muséu de la Sidre, Juan Stové. Amás, tan convidaes a la presentación toles muyeres qu’apaecen nel llibru, que recibirán un exemplar de baldre.
La selmana que vien y dientro de la mesma coleición presentaráse’n Xixón “Toma un culín, perspeutiva poética de la sidre”.
Llucía Fernández
This work is licensed under a Creative Commons Attribution 4.0 International License.
