Bonos díes, bona xente.
Alborecemos con intervalos nubosos y dalguna precipitación febles ya dispersa con unes temperatures que tan alrodiu de los 6ºC, rexistrándose nel puirtu Payares -1,9ºC con munchu borrín.
Güei vamos tener intervalos nubosos entemecios ente dellos claros o abancios cola posibilidá de que caiga dalguna gotera dispersa ya ocasional, les temperatures en descensu y l’aire va quedar sele ya variable.
Mañana sábadu seguiremos con intervalos nubosos entemecios ente dellos claros o abancios pero ganando terrén estos últimos con un descensu de les temperatures mínimes, mentantu les másimes subirán. L’aire de componente noroeste pue soplar con raches moderaes nel llitoral y zones altes.
El domingu va dir coyendo fuercia l’aire de componente noroeste y empobinándonos nubosidá pa dexanos precipitaciones febles nel últimu tramu del día. Les temperatures másimes en llixeru descensu y la cota de nieve rondará los 1800m.
El llunes vamos tener nubosidá abondosa con precipitaciones febles pela mañana que sedrán en forma de nieve perriba de los 1500m con unes temperatures en descensu.
El día de nueche bona tará nuboso pero sin lluvia y pela nueche surdirán nublines ya borrinos no fonderu los valles y paez que’l día de Navidá va tar poco nuboso o escampláu pero esto yá lu diremos viendo.
Que paséis un bon vienres collacies ya collacios.
Semeya de Peña Rueda en les Ubiñes que mos l’apurre’l nuesu collaciu Garcia Xurdin.
This work is licensed under a Creative Commons Attribution 4.0 International License.
