Munches de les muyeres qu’apaecen nel llibru acudieron ayeri, pesi a les complicaciones que’l so trabayu -echar sidre- tien siempres no que cinca a horarios, a la presentación del llibru col que la editorial Espublizastur homenaxea el so importante llabor nel caltenimientu de la cultura asturiana de la sidre. 

El Muséu de la Sidre de Nava acoyó ayeri la presentación del llibru de la coleición Cimbriella “Muyeres qu’echen sidre”. Na presentación intervinieron Susana Sela, autora de los testos, y Flavio Lorenzo, de les semeyes; ambos coincidieron no interesante de dir investigando y descubriendo histories, buscando información pa llocalizar muyeres que dedicaren la so vida a echar sidre pa otros, chigreres, camareres… de munches edaes, munches xeneraciones, munchos llugares, creando un mapa completu que permite a lo llargo’l llibru dir siguiendo la evolución del entornu sidreru y comu se foi normalizando la presencia de muyeres tres d’una barra, dende’l “tú nun me lo eches, que me lo eche él” -o coses piores- que munches tuvieron d’aguantar a la igualdá a la hora d’echar la sidre o competir. Hubo un momentu de recuerdu y agradecimientu pa les pioneres que fueron abriendo camín, presentándose a los concursos o negándose a dexar el so llugar a un paisano, gracies a elles agora la presencia femenina nel otru lláu de la barra ye ca vuelta mayor y dafechu aceptada; tamién tan presentes nel llibru les nueves promeses, que van ganando puestos nel Campeonatu d’Escanciadores.

Especialmente emotivu foi el momentu de remembranza al lleer el prólogu que David M. Rivas Infante, recientemente fináu, dexó escrito pa esti llibru. La so presencia na presentación  representóse con un sombreru y una tarabica -señes que siempres lu identificaron- na siella que debía ocupar. Carmen Pérez, editora, foi la encargada de lleer el testu en so nome.

Depués de la presentación los autores dedicaron los llibros que se regalaron a les asistentes que formen parte de la obra.

Llucía F. Marqués

This work is licensed under a Creative Commons Attribution 4.0 International License.