Bonos díes, bona xente.
“Ta nevando más nos puertos de los esperáu”
Alborecemos col cielu nuboso y precipitaciones intermitentes con unes temperatures que tan alrodiu de los 8ºC, rexistrándose nel puirtu Payares -0,9ºC onde nieva feblemente.
Güei vamos tener el cielu mui nuboso con precipitaciones febles ya intermitentes pela mañana ya con tendecia a dir desapareciendo pela tarde con unes temperatures en descensu moderáu ya cola cota de nieve que surdirá perriba de los 1300-1400m. L’aire sele en xeneral de componente norte.
Mañana martes día de nueche bona va tar el cielu entovía nuboso pero cola apertura de dalgún tímidu claru o abancio nes hores centrales del día, nun s’eperen precipitaciones y van surdir nublines y borrinos al finar el día no fonderu los valles y zones llanes. Les temperatures másimes subirán dalgo, sobre too en zones de montaña, mentantu les mínimes descenderán moderadamente. L’aire sedrá sele ya variable con dalguna racha moderada de nordés en zones altas ya en puntos del llitoral.
El miércoles día del Nadal abriranse grandes claros o abancios y saldrá por fin el sol, anque alboreceremos en munches zones envueltos ente’l borrín y la nublina con unes temperatures másimes que suben otru poquitín más pero l’ambiente seguirá siendo más bien fríu y humedu.
El restu la selmana dominará l’atmósfera l’anticiclón ya tendremos escasa nubosidá con temperatures suaves a primera hora de la tarde y más bien fries el restu, con muncha humedá peles nueches que fadrá que surdán nublines y borrinos al atapecer.
Que paséis un bon llunes collacies ya collacios.
Semeya que mos l’apurre’l nuesu collaciu Garcia Xurdin.
This work is licensed under a Creative Commons Attribution 4.0 International License.
