La cabera concentración del añu delantre la Gota Llechi aconceyó cientos de persones pa remembrar a les cerca de cien muyeres y rapacinos asesinaos a lo llargo’l 2024 pola violencia machista
Demientres la concentración, na que 91 esqueles posaes embaxo daben fe del númberu de muertes, lleéronse los nomes de toles víctimes, representaes por otres tantes muyeres que, llevando mázcara, portaron con arguyu los sos nomes, torgando l’escaezu. La pancarta decía 90, pero a cabera hora foron 91, d’ente 16 díes y 90 años, cerca de cien víctimes, incluyendo 15 menores d’edá.
Nel manifiestu lleíu demientres la concentración recalcóse que nun son namás asesinatos “Tres de ca muyer asesinada hai una hestoria de violencia cotidiana, sicolóxica, física, sesual… de muyeres maltrataes y perversamente aislaes, polos sos maltratadores… muyeres silenciaes pol mieu a falar… muyeres que viven pesess baxo’l terror de los sos maltratadores, muyeres que, na so soledá,
intuyen el so desenllaz”.
Tamién s’apuntó hacia la culpabilización de les muyeres por parte de la sociedá, col mensaxe soyacente del “daqué fadría” que vien a xustificar la violencia y dificulta la ya difícil pidía d’ayuda. D’ehí el mensaxe que da títulu al manifiestu “que la vergoña camude de llau”, que dexen de ser les víctimes les que pasen vergoña pa pidir protección y qu’entamen a ser los violentos los que sientan sobre si la presión de la sociedá. “Toa sociedad tien la violencia que tolera. Y la violencia contra les muyeres tolérase”.
Los convocantes son Andecha Ástur, Anticapitalistes, Amamantar, l’Asociación de Pensionistes de Xixón, l’Asociación Ecofeminista Petra Kelly d’Asturies, el Colectivu de Trabayadores, Feminismu en Llucha del CSI, la plataforma del serviciu d’ayuda a domiciliu -SAD-, Podemos y Verdes-Equo.
Cruzamos los deos -nun mos queda más que facer, ante’l desinterés de quienes podríen poner midies- y esperamos que polo menos el primer miércoles de fin de mes del añu qu’entama nun teamos por qu’aconceyar, que pase siquiera un mes ensin víctimes.
Llucía F. Marqués
This work is licensed under a Creative Commons Attribution 4.0 International License.
