El Sindicatu Vivienda d’Asturies llogró paralizar el desfiuciu previstu pola empresa pública VIPASA, de la Conseyería Vivienda, pal viniente 31 d’avientu
La hestoria d’Ursula, ma de dos fios que vive va doce años nun llar propiedá de la empresa pública VIPASA, na Corredoria, entama cuando la Conseyería de Vivienda del Principáu cedió al fondu utre AVN la xestión del pisu de los sos pas. La privatización d’esi pisu llevó a un descomanáu incrementu de los alquileres, que los pas d’Ursula nun pudieron afrontar, siendo ello que foi la so fia la qu’apurrió les perres pa, mientres pudo, pagar los alquileres, desatendiendo’l pagu del arriendu propiu. La delda foi medrando y llegó un momentu en que nun pudieron seguir faciendo frente a les abusives condiciones, colo que la familia d’Ursula hebio desplazase entera a la casa d’esta.
Asina, la vivienda -pública- de la que menacien desfiuciar a esta familia ta habitada por dos persones d’avanzada edá, una muyer y dos rapacinos, que ven como ye la mesma Administración del Principáu quien los denuncia por impagos y los quier dexar na cai.
“Ovidio Zapico ya’l so equipu d’IU Asturies, xunto cola xerente de VIPASA, Susana González quieren desafiuciar a la nuesa compañera Ursula y su familia el 31 de diciembre” denuncien dende’l Sindicatu Vivienda d’Asturies, que por agora, cola so campaña pública, consiguieron paralizar el desfiuciu. Dende’l sindicatu anunciaron ya que nun se van conformar con retrasar el desallugu, sinón que van siguir desixendo la cancelación del procesu xudicial y la cancelación total de la deuda per parte de VIPASA.
Llucía F. Marqués
This work is licensed under a Creative Commons Attribution 4.0 International License.
