Dempués de la descarbonización nun s’esanició’l consumu del mineral fósil pa la producción d’enerxía, a cencielles buscáronse provisores más económicos que Asturies, ensin importar l’impactu social y medioambiental de les mines d’onde s’estrai

Con toles mines de Asturies zarraes pola llamada “descarbonización” cola que se diba a sustituyir la producción d’enerxía por medios térmicos al traviés de la combustión de carbón, los puertos de Xixón y Avilés siguen siendo piqueros nel tráficu d’esti mineral, pero yá nun dando salida a la producción asturiana, sinón siendo’l puntu d’entrada de miles de tonelaes de carbón colombiano o Kazaxu, ente otros. Carbón extraido en mines, munches vegaes albentestate, onde nun se respeten les más mínimes condiciones llaborales, onde trabayen menores y onde’l control del impactu ecolóxicu ye inesistente. Esa ye la verdadera transición carbonífera, Europa sigue precisando carbón, pero yá nun lo merquen en llugares onde los trabayadores reclamen los sos drechos, prefieren abaratar costos a fuerza d’inxusticia.

Siquier 45 mineros finaron l’añu pasáu na quema d’una mina en Kazaxistan, la mesma qu’apurre carbón a la factoría asturiana d’Arcelor Mittal; anque ye l’accidente más llamativu, les desgracies d’esi tipu son continues nuna minería na que la seguridá ye tou menos prioritaria. En Colombia, fai una década escasa, el desviu d’agua a les mines qu’abastecen El Musel mató de sede a más de cinco mil neños y neñes indíxenes. Aprosimao’l 70% de l’actividá minera en Colombia realizase de manera “informal”, esto ye, ensin control de nengún tipu sobro condiciones llaborales nin efectos sobro’l mediu ambiente. 

Fueron necesaries décades de llucha pa que los mineros asturianos salieren de condiciones asemeyaes y namás la llucha obrera de la minería consiguió les condiciones llaborales que permitien a los mesmos trabayar en condiciones aceptables de seguridá y remuneración, pero bastó con un movimientu globalizador amarutáu d’ecoloxía pa tirar pelos suelos toos esos llogros. Agora les cuenques mineres amorien, con 28.000 puestos de trabayu directu menos, mientres los esplotaos son otros, a miles de Km., produciendo un carbón esactamente igual de contaminante. 

Asturies non solo perdió decenes de miles de puestos de trabayu y un texíu social fuerte, con conciencia obrera, sinón que tamién  perdió la so soberanía enerxética -nel 2011 Hunosa llograba  185,3 millones vendiendo parte del Almacenamientu Estratéxicu Envernada del Carbón, vienta que foi rematando nos siguientes años-. Apocayá anunciábase en prensa, non ensin ciertu sensacionalismu, que’l puertu d’Avilés batía’l so récord de descarga máxima cola entrada na ría local del granelero ‘Kristian Oldendorff’ cargáu con 65.946 tonelaes de carbón proveniente de Cazayistán pa la empresa García-Munté Enerxía. Tomáronnos -otra vegada- el pelo.

Llucía F. Marqués