La paradoxa migracional n’Asturies,  cuasi diez mil asturianos forciaos a emigrar pa trabayar frente a 12.489 españoles que vienen a vivir a Asturies

Pente l’añu 2021 y 2023 la población procedente d’España que vien a vivir p’Asturies subió un 26%, con una llegada de 12. 489  persones. Al mesmu tiempu, 9.892 asturianos desplazábense a territoriu español. Con 41 de les 50 provincies españoles, hay más recién llegaos qu’asturianos que se desplacen p’allí. Llama l’atención especialmente la llegada de madrileños, que se multiplicaron por tres, pasando d’un saldu negativu, nel que más asturianos colaben que madrileños veníen a un saldu de 858 entraes más que salíes.

El teletrabayu y la meyora de les comunicaciones tien muncho que ver con esta dinámica, de manera que d’Asturies sal xente buscando trabayu y a Asturies lleguen persones que trabayen a distancia, cotizando n’otros llugares pero residiendo equí. Ye una inmigración bien desemeyada a la que vien d’América o d’Europa del Este; polo xeneral trátase de persones con bona capacidá adquisitiva que topen n’Asturies non solo un llugar prestosu pa vivir, sinón unos precios más afayaizos, en comparanza colos de la capital española.

L’efectu secundariu más inmediatu ya se nota nel mercáu inmobiliariu, con una medría xeneralizada de los precios que dexa les viviendes n’Asturies fuera del algame de la mayoría de la población asturiana. Les consecuencies culturales y llingüístiques tamién son importantes y ye preciso tomar midies, comu facilitar l’aprendizaxe del idioma o sofitar les actividaes culturales venceyaes a la tradición asturiana, pa integrar na nuesa cultura a toa esta xente recién llegao -non solo d’España, sinón d’otros llugares del mundu- pa que puedan formar parte real de la sociedá asturiana. 

Llucía F. Marqués