Bonos díes, bona xente.
” Vientu fuerte y temperatures altes”
Alborecemos col cielu mui nuboso y raches fuertes de vientu en zones de montaña que superen los 100km/h, amás con temperatures altes, alrodiu de los 17ºC, rexistrándose nel puirtu Payares 4,1ºC.
Güei vamos tener nubosidá cola apertura de dalgún claru o abanciu pela tarde, sicasí pue cayer dalguna gotera nes hores centrales del día, amás l’aire ábrigu va condicionar les temperatures por mor del efeutu foehn que fae al pasu pela cordelera, faciendo que se disparen en superficie, sobre too nel llitoral, tamién s’esperen raches mui fuertes de vientu en zones altes de montaña.
Mañana xueves va dir amenorgando l’aire a partir del mediudía mentantu aumentará la nubosidá cola posibilidá de que caiga dalguna gotera durante la tarde con unes temperatures que se caltendrán altes pero con tendencia a descender dalgo al finar el día.
El vienres seguiremos col cielu mui nuboso y de nuevu aumentará la fuercia del aire con un ascensu de les temperatures. Al escurecer tendremos precipitaciones que sedrán más abondoses col camudu’l día.
Que paséis un bon miércoles collacies ya collacios.
Semeya que mos l’apurre la nuesa collacia Conchi Vallejo Suarez
This work is licensed under a Creative Commons Attribution 4.0 International License.
