Seique pente los años 2018 y 2022 medró abondo la cantidá de tesis defendíes n’asturianu, dende entós pacá nun se rexistrare denguna

“Acustemoloxía de la nueche en danza: descripción etnográfica y recursividá”, de Llorián García Flórez ye’l nome de la tesis defendía ayeri na Universidá d’Uviéu y que costitúi la númberu trece de magar la defendía nel añu 1988 por Ramón d’Andrés, pioneru nel usu de la llingua asturiana na Universidá. Esa primera tesis entitulábase “Aspeutos sociollingüísticos d’una parroquia xixonesa (Deva)” y nun foi fasta cuasi venti años más tarde, ya nel 2007, cuando Pablo Suárez García garró’l testigu presentando “La fala de Trubia (Asturies): estudiu sincrónicu y diacrónicu, onomástica y aspectos sociollingüísticos”. Saliendo del tema llingüísticu ya entrando nel lliteraiu, Pablo Suárez García presentaba nel añu 2011 “El papel de los escritores del Surdimientu na recuperación del asturianu: la visión del escritor – Xuan Santori Vázquez”. Nel 2016 presentóse la primer tesis n’asturianu fuera de la Universidá d’Uviéu. En concreto, les  “Bases pa un Corpus de teatru n’Asturies” defendióse na Universidá de Vigo, pol so autor Antón Caamaño. (Na Universidá de Vigo).

De magar equí, y pesi a los munchos pilancos, foi faciéndose más avezao, rexistrándose tesis n’asturianu tolos años dende’l 2018 al 2022, cuando tornó haber un parón que rompe esti trabayu de Llorián. Asina, nel 2018 Xuan Xosé Lajo presentaba “L’allugamientu del dialeutu senabrés dientro del dominio ástur. Estudiu descriptivu de la fala senabresa” y nel 2019 “Estudios diacrónicos del paisaxe y el poblamientu nel noroeste ibéricu: el territoriu d’Ayande (sieglos I-XIII)”, un trabayu d’Andrés Menéndez Blanco.

Ensin salir del tema llingüísticu, pero adientrándose tamién na hestoria reciente, Inaciu Galán presentaba la so tesis “La llingua asturiana nel Franquismu”  nel añu 2020, cuasi al tiempu que Claudia Elena Martínez defendía la de so: “El sistema de denominación de los neños abandonaos n’Asturies”.

Xurde Fernández presentaba un añu depués”Trabayar por proyectos na asignatura de Llingua Asturiana y Lliteratura na Educación Secundaria Obligatoria” y con pocu tiempu pel mediu asoleyábase “Estudiu dialectométricu ente la frontera del asturianu central y l’asturianu occidental (EDACEO)”, de Miguel Andrés Rodríguez Monteavaro.

Ya nel 2022 presentábense dos tesis: “El Prácticum IV de la Mención de Llingua Asturiana. Análisis y Propuestes de Meyora” de Roberto Avello Rodríguez y “Documentación histórica de la toponimia de La Güeria Carrocera (Asturies)”, de Severino Antuña.

Con “Acustemoloxía de la nueche en danza: descripción etnográfica y recursividá” Llorián García Flórez ruempe con cerca tres años ensin que l’asturianu tuviere presente en denguna tesis universitaria y esperamos que seya namás la primera de munches otres que se defendan esti añu y los vinientes. 

Alberto Rodríguez

This work is licensed under a Creative Commons Attribution 4.0 International License.