El númberu de persones que, teniendo un puestu de trabayu, busquen emplegu al traviés del SEPE, amóntase mes a mes, siendo especialmente frecuente ente les muyeres

Según los cáberos datos recoyíos, les muyeres representen el 58% de les persones en paru, pero amás son tamién el 68% de les persones que, teniendo un emplegu, busquen otru al traviés del SEPE pa complementar los sos ingresos. En total son 6.049 los demandantes d’emplegu que yá tán ocupaos pero entá asina siguen inscritos nel Serviciu d’Emplegu, por resulta-yos los sos trabayos insuficientes o indeseados. D’ellos, 4.117 son muyeres frente a 1.932 homes.

Estes cifres rescamplen una vegada más el fechu de que les muyeres apuerten a puestos de trabayu de peor nivel y más precariedá, polo xeneral a tiempu parcial, un trabayu col que nun ye posible establecer un proyectu de vida minimamente dignu.

Nun podemos escaecer, falando esta tema, de que les muyeres representen un peraltu porcentaxe del trabayu que se realiza en prieto, esto ye, que nun consta niundes, lo que non solo les dexa desarimaes y ensin dalu tipu de drechu llaboral sinón que nun se reflexa nes estadístiques.

Nel Dos Santos

This work is licensed under a Creative Commons Attribution 4.0 International License.