Bonos díes, bona xente.
” Lleguen les xelaes”
Alborecemos col cielu poco nuboso o escampláu anque no fonderu los valles tendemos delles nublines con unes temperatures que tan alrodiu de los 3ºC, rexistrándose nel puirtu Payares 1,1ºC
Güei vamos tener escasa nubosidá, sicasí pue surdir dalguna nube alta de poco importancia con unes temperatures en descensu que mos dexará másimes que malpenes algamarán los 11-12ºC ya col aire que sedrá sele ya variable.
Mañana martes sedrá l’alborecer más fríu de la selmana con xelaes xeneralizaes na mayor parte d’Asturies, nel cielu habrá escasa nubosidá, sicasí tornarán a surdir delles nublines nes zones favoretibles de lo fonderu los valles y l’aire seguirá siendo sele ya variable.
El miércoles vamos tener un tiempu mui asemeyáu anque surdirá dalgo de nubosidá estratificada nel llitoral y fastera central, tando más escampláu hacia la cordelera. L’aire de componente norte sele que ye’l que mos apurrirá la nubosidá.
El xueves a partir de la tarde va soplar dalgo cafiante l’aire nordés nel llitoral y zones espuestes y nel cielu tendremos poques nubes con xelaes nes zones favoretibles.
El vienres ya sábadu seguirá poco nuboso con ambiente ivernal poles xelaes y el domingu paez que tendremos dalgo más de nubosidá pero esto yá lu diremos viendo.
Que paséis un bon llunes collacies ya collacios.
Semeya que mos l’apurre’l nuesu collaciu Pachu Armesto Hevia.
This work is licensed under a Creative Commons Attribution 4.0 International License.
