El LlABoratoriu de Soníu ye un “espaciu pa la esperimentación y producción d’obres al traviés de residencies d’artistes sonoros y músicos mesmo emerxentes qu’afitaos” onde se facilita el trabayu a creadores musicales. Nesta edición van apoyase dos proyectos palLlABoratoriu de Soníu, un espaciu preparáu pa trabayos musicales y equipáu con dellos recursos técnicos. Habrá otres cuatro residencies pa los sos estudios -más enfotaos a les artes visuales- Les residencies escoyíes van deseldolcase ente’l 4 de febreru y el 31 de xunetu de 2025 per un tiempu mínimu d’un mes y máximu de seis.

Espérase d’estos proyectos que les persones escoyies desarrollen pieces rellacionaes coles práctiques sonores y musicales de la creación contemporánea. Amás, la iniciativa pon a disposición otros recursos como’l fabLlAB -un llaboratoriu de creación dixital- y la biblioteca especializada del centru.

Otres convocatories abiertes

Amás d’esta convocatoria específica del LlABoral Centru d’Arte y Creación Industrial, l’espaciu ta asociáu a otres dos iniciatives asemeyaes. Per un llau, les Ayudes a la creación, investigación y producción de proyectos artísticos en residencia TABACALERA, un programa del Ministeriu de Cultura pal que yá ta abierta la convocatoria hasta’l 28 de xineru y que quier financiar proyectos nel campu de les artes visuales y la creación contemporánea, amás de fomentar la movilidá d’investigadores y creadores. Per otru, La Llaboral entama tamién una collaboración col centru iMAL de Bruseles, una residencia d’investigación artística d’un mes pa la que’l formulariu ta abiertu hasta’l 19 de febreru.