Dende la SUATEA denuncien la situación que ta viviendo esti iviernu l’alumnáu y profesoráu del Centru d’Educación de Persones Adultes (CEPA) del Nalón, en Samartín del Rei Aurelio, por falta de calefacción, y que fai que la mayoría de los díes tengan que tar en clas con temperatures que ronden los 8ºC.
El 17 d’ochobre, n’una xunta caltenida ente l’alcalde de Samartín del Rei Aurelio, la conceyala d’Educación y les direcciones de los centros del conceyu solicitar al consistoriu que contactara cola empresa encargada del caltenimientu de la caldera (Uría Calefacción) pa dar en el so encendíu y puesta a puntu.
El 24 d’ochobre comunicóse-y a la concejala d’Educación que’l silu de los pellets taba vacíu y apuraba la so recarga. El 6 de payares el centru contactó de nuevu cola concejala pa conocer l’estáu de recargar del silu, asina comu’l del encendíu y revisión de la caldera.
El día 8 d’esi mes finalmente realizóse la carga y el día 12 la empresa punxo en furrulamientu la caldera, pero esi mesmu día l’equipamientu dio’l primer fallu. Al día viniente asocedieron otros dos fallos.
El día 13 de payares la CEPA contactó cola empresa y con la conceyala pa informar de los fallos
a dambes partes, y el día 14 informóse al centru de que yera necesario susituyir un ventilador.
A lo último, la empresa informó de que, pa poder solucionar los problemes definitivamente, yera necesario camudar la caldera, cuidao que llegó a la fin de la so vida útil.
La realidá actual de la CEPA del Nalón ye que nun hai calefacción y que’l personal ta viéndose obligáu a llevar a les clases calefactores eléctricos propios p’apangar les condiciones climátiques de les instalaciones. Por si fore poco, esto tien les sos llimitaciones, cuidao que les sobrecargues faen que salten los automáticos y nun puedan siguir usándose dichos calefactores muncho tiempu siguíu.
Dende la SUATEA punxeron estes incidencies en conocencia del Serviciu de Prevención de Riesgos Llaborales del Principáu, y desixen al Conceyu de S.R.A. que se ponga manes a la obra pa solucionar la situación, yá que ye la so competencia. “Paeznos intolerable que pueda tenese más de trés meses a profesoráu y escolinos papando fríu y nunes condiciones indignes”.
Llucía F. Marqués
This work is licensed under a Creative Commons Attribution 4.0 International License.
