Bonos díes, bona xente.
” Inversiones térmiques, más fríu no fonderu los valles que’n los puertos “
Alborecemos col cielu poco nuboso o escampláu, sicasí na fastera ocidental tenemos dalgo de nubosidá alta con unes temperatures que tan alrodiu de los 0ºC, rexistrándose nel puirtu Payares 2,2ºC.
Güei vamos tener escasa nubosidá que mos dexará un día mui soleyeru, sobre too nes zones altes, onde la llume del sol fadrá que suban abondu les temperatures a partir del mediudía, mentantu no fonderu los valles, el escasu movimientu atmosféricu por mor del anticiclón va dexar atrapáu l’aire fríu más pesáu con unes temperatures másimes muncho más contenies que malpenes sobrepasarán los 10ºC a primera hora de la tarde faciendo que tengamos iversiones térmiques importantes.
Mañana xueves como novedá tendremos dalgo de nordés pela costa que baxará entovía más la sensación térmica con unes temperatures que van camudar poco, acentuándose les iversiones térmiques, muncho más fríu no fonderu los valles que nes zones altes ventilaes.
El vienres y sábadu seguiremos con escasa nubosidá y xelaes nes zones baxes por iversión térmica ya’l domingu paez qu’aumentará la nubosidá ya entamarán a rompese les piscines d’aire fríu de lo fonderu los valles.
Que paséis un bon miércoles collacies ya collacios.
Semeya fecha dende’l Monsacro con su capilla y al fondu Uviéu que mos l’apurre la nuesa collacia Conchi Vallejo Suarez.
This work is licensed under a Creative Commons Attribution 4.0 International License.
