Nun s’alvirtió a la población del riesgu que supón alendar, riesgu que pue dir amontando según pasen los díes ensin llover ya ensin dispersión de los contaminantes. La omisión de responsabilidaes énte esti problema de salú pública y la falta d’un protocolu d’actuación, alverten dende la CEA, ye una actitú inxustificable
Por mor del episodiu de contaminación nel que tamos somorguiaos, col bencenu disparáu un 300 per cien perriba del másimu permitíu pola OMS y les partícules amosando concentraciones bien alzaes en delles zones de la capital asturiana, la Coordinadora Ecoloxista d’Asturies reclama al Principáu y al Conceyu d’Uviéu qu’activen yá’l protocolu de contaminación del aire nel conceyu nel so nivel Informativu, d’alcuerdu al Real Decreto 24/2023.
Les partícules de menos de 2,5 micres superaron yá na estación de Trubia los niveles d’activación que determina l’actual normativa que son 25 µg/m³, pa 24 hores, mientres 3 dies, llegando a algamar valores de 175 µg/m³ de les partícules de menos de 2,5 micres, que’l so valor encamentáu ye 15.
Tamién se algamaron ayeri y güei los 24,1 µg/m³ del canceríxenu bencenu y los 194 µg/m³ de les partícules de menos de 10 micres en Trubia (el so valor encamentáu ye 50). Amás, güei algamáronse los 129 µg/m³ de les partícules de menos de 10 micres en Ventanielles.
Acordies colo afitao nel RD 24/2023, cuando se supere o se prevea que se va a superar l’estragal d’información o d’alerta del anexu, les alministraciones competentes van adoptar les midíes necesaries d’urxencia y van informar a la población, daqué que nin el Principáu nin el Conceyu fixeron a pesar de ser conocedores del grave problema del aire qu’alienden los vecinos.
Amás, la situación que reflexen los datos oficiales sobro contaminación atmosférica y calidá del aire que’l Gobiernu d’Asturies facilita na so web (según la obligación que tien recoyida na Directiva 2008/50/CE y el R.D 102/2011), inda puede empiorar, a la vista de la falta de precipitaciones prevista nos próximos díes.
Les Alministraciones encargaes de la xestión son los responsables d’evitar un casu grave de salú pública. Na actualidá, la cantidá y calidá de los estudios que demuestren cómo afecta la contaminación ambiental a la salú de les persones, al desenvolvimientu de les funciones cognitives en menores d’ocho años y a la calidá de vida d’una población, nun pueden ser resalvaos por una clas dirixente que nun adopta les midíes necesaries poniendo asina en peligru a la población.
Susana Sela
This work is licensed under a Creative Commons Attribution 4.0 International License.
