Cuntando cola collaboración de la Universidá d’Uviéu y del Gobiernu del Principáu d’Asturies, l’Academia de la Llingua Asturiana, el Congresu Mundial de Cultura Asturiana (CMCA25) defínese como un foru au converxer dende les metodoloxíes, visiones y problemátiques más actuales

El martes cuatro de febreru a les cuatro la tardi entamará nel Edificiu Históricu de la Universidá d’Uviéu l’apretau programa del Congresu Mundial de Cultura Asturiana 2025, un alcuentru cola nuesa cultura comu protagonista concebíu concebíu de forma interdisciplinar y amplia: dende l’antropoloxía a les demás ciencies y estudios sociales, d’Asturies a cualquiera de los sos marcos de referencia.

La inaguración oficial, a les cincu y media, tará a cargu del Presidente Adrián Barbón, que tará acompangáu por Ignaciu Villaverde, Rector de la Universidá d’Uviéu, y Xose Antón Glez. Riaño, Presidente de l’Academia la Llingua Asturiana. Darréu tendrán llugar les dos primeres ponencies de les más de 60 que demientres estos cuatro díes van afondar en cuestiones tan estremaes como’l mundu rural, el balle, la folixa, los medios de comunicación, la gastronomía los procesos d’identidá, el padremuñu, el paisax,la tradición oral, la ciudá, la cultura espresiva, la pertenencia al Arcu Atlánticu, la educación o’l xéneru. Destaquen pente elles les siete conferencies plenaries a cargu d’antropólogos de impactu internacional, amás de la exposición de paneles etnográficos qu’acompangarán l’eventu.

El congresu destaca pol so enfoque dual nel que per un llau busca ser acesible al públicu xeneral, y pel otru, quier consolidar la so vertiente académica. Amás,  articúlase en sesiones paraleles que permitirán a los asistentes escoyer pente una amplia variedá de meses reondes y ponencies.

Pa consultar el programa íntegru ya información concreta sobre charres y ponentes, pue consultase la páxina web de l’ALLA.