Bonos díes, bona xente.

” Últimu día de cielu escampláu “

Alborecemos col cielu escampláu ya con unes temperatures que tan alrodiu de los 2ºC dientru de les zones más urbanes y xelando nel restu, rexistrándose nel puirtu Payares -0,8ºC.

Güei vamos tener un día per guapu col cielu escampláu per completu, mui soleyeru con muncha lluz , sicasí les temperatures sedrán fríes con másimes que malpenes pasarán de los 11-12ºC a primera hora de la tarde, volviendo a baxar al escurecer y xelando de nuevu antes de finar el día. L’aie sedrá sele ya variable.

Mañana domingu alboreceremos con una bona xelada pero sedrá la última, a partir del mediudía aumentará la nubosidá y a última hora podremos tener dalguna precipitación feble que sedrá en forma de nieve a partir de los 1300m, dalgo más baxo nos valles onde se conserve’l fríu d’estos díes. L’aire sedrá sele de componente sur.

El llunes tendremos nubes ya claros o abancios con un ascensu de les temperatures, sobre too de les mínimes por mor de les nubes.

Y a partir del martes s’instalará una circulación atmosférica zonal con un potente chorro polar impulsáu pola descarga fría importante que van tener sobre Terranova, la fabrica de borrasques del hemisferiu norte, empobinándo sobre Europa, a través del atlánticu , una sucesión de borrasques que mos dexarán el pasu de frentes atlánticos con unes temperatures como una montaña rusa con subides y baxaes bultables nel mesmu día, amás de fuerte vientu ábrigu y gallegu con temporales na mar, pero esto yá lu diremos viendo.

Que paséis un bon día collacies ya collacios.

Semeya que mos l’apurre’l nuesu collaciu

Luis Alfredo Hernandez Fernandez

This work is licensed under a Creative Commons Attribution 4.0 International License.