Bonos díes, bona xente.
” Suben les temperatures”
Alborecemos col cielu nuboso y dalguna gotera con unes temperatures que tan alrodiu de los 8ºC, rexistrándose nel puirtu Payares 2,1ºC.
Güei vamos tener intervalos nubosos entemecios ente dellos claros o abancios con vientu ábrigu qu’hará subir les temperatures a partir del mediudía.
Mañana miércoles tendremos el cielu mui nuboso con precipitaciones a partir de la tarde cuando l’aire va rolar a componente norte con unes temperatures mínimes n’ascensu moderáu, calteniéndose les másimes y tendiendo a descender al finar el día cuando la cota de nieve baxará hasta los 1500-1600m dende los 2000m de primera hora de la tarde.
El xueves alboreceremos ente’l borrín y la nublina que tenderá a dixebrase a lu llargu la mañana quedando’l cielu poco nuboso en xeneral. Les temperatures en descensu a pesar de la llume del sol y l’aire sedrá sele ya variable.
El vienres entamará a soplar con fuercia l’aire ábrigu, subiendo de nuevu les temperatures ya tendremos el cielu nuboso cola apertura de dalgún claru o abanciu. Y el sábadu rolará a gallegu apurriéndonos precipitaciones y un descensu de les temperatures pero esto yá lu diremos viendo.
Que paséis un bon martes collacies ya collacios.
Semeya de Puertu de Veiga que mos l’apurre la nuesa collacia Conchi Vallejo Suarez.
This work is licensed under a Creative Commons Attribution 4.0 International License.
