Esti vienres 24 la Casa’l Chinu de Cimavilla acueye un actu solidariu nel que va proyectase’l videoclip del tema ‘Nun ye delitu’, nel que participen dellos renomaos artistes de la escena musical asturiana
El vienres a les siete la tardi va tener llugar l’actu de presentación del canciu ‘Nun ye delitu’, el tema col que dellos artistes de la música’l país apurren el so sofitu a les sindicalistes represaliaes, condergaes por defender nel añu 2017 los drechos d’una compañera frente al acosu llaboral y sexual al que la sometía el propietariu de la ya presllada Pastelería la Suiza. La persecución a l’acción sindical acomuñó dende’l primer momentu centenes d’amueses de solidaridá, non solo por parte de la sociedá asturiana sinón tamién a nivel internacional, recibiendo’l respaldu de munches estayes de la sociedá asturiana, incluyendo l’ámbetu musical.
El 24 de febreru van dar un pasu más presentando esti cantar y estrenando’l videoclip nun actu nel qu’intervendrán dellos de los artistes participantes y nel qu’habrá sesión musical acústica. ‘Nun ye delitu’ va llanzase’l sábadu 25 en toles plataformes musicales.
El de les 6 de La Suiza ye ún de casos los más graves de persecución a l’acción sindical nos últimos años, tando condergaes a tres años y mediu de cárcel y pagar una multa de mas de 125.000 euros.
Nel Dos Santos
This work is licensed under a Creative Commons Attribution 4.0 International License.
