La dependencia de les polítiques españoles nel gobiernu d’Asturies tien consecuencies comu esta imposibilidá de caltener un alcuerdu que beneficiaba -o polo menos compensaba l’anterior perxuiciu- a miles d’asturianos

El 20 de febreru de 2023 roblábense los llamaos ‘Alcuerdos de la Castellana’ en compensación pol llamáu ‘fiascu ferroviariu’ nel que, nuna inédita demostración d’ineficacia, s’encargaren trenes más grandes de lo que cabía pelos túneles asturianos.

Esos alcuerdos incluyíen la promesa de que n’Asturies y Cantabria caltendríase les cercanies de baldre hasta la entrega de les unidaes de trenes pendientes, lo que tendría de blindar los abonos de baldre polo menos dica’l 2026; pero nun va ser asina. 

El revés del Gobiernu estatal cola derogación del so ‘decretu ómnibus’ non solo baxa los salarios a pensionistes y perceptores del IMV sinón que tien una consecuencia estra n’Asturies.  Renfe dexará darréu de vender los abonos de baldre, incluyendo los asturianos, que dexarán de percibir nesi conceutu un desembolsu añal de cuasi ocho millones d’euros. 

Como reacción a esti nuevu dispreciu a los intereses de los asturianos Adrián Barbón va reaccionar contundentemente, escribiendo un twitter enfurruñáu nel que curiará permuncho de nun criticar a los sos superiores en Madrid.

Llucía F. Marqués

This work is licensed under a Creative Commons Attribution 4.0 International License.