Un diría que cualisquier persona qu’algame un puestu n’alministración sabría escribir correchamente; al paecer, nun ye asina, ya que dende’l Principado valoren que necesiten d’una guia específica que yos enseñe comu redactar. Y nun val pa ello tirar de cualisquier llibru de testu o manual ya esistente, sinón que consideraron imprescindible encargar a la Universidá d’Uviéu un documentu específicu que, baxo l’entítulu de “Guía pa escribir con claridá n’Administración”.

Esta ‘imprescindible’ guía trátase d’un documentu dixital, disponible na web del Principau, nel que los trabayadores de l’alministración alcuentren recomendaciones d’estilu y forma pa escribir de manera comprensible, del nivel de “pensar anantes d’escribir” o “utilizar un llinguaxe claru, cenciellu, concretu o inclusivu”. 84 páxines, 9.500 pallabres que, pol módicu preciu de 18.029  euros -214 por páxina- enseñen al funcionariáu cuestiones que cualisquier rapacín que finare primaria tien clares. Más entá, la guia, en formatu pdf, inclui 44 fiches resume y delles illustraciones, quedando depués de restar la bibliografía y l’indiz, en venti páxines útiles, lo que dexa la media en cerca de mil euros por páxina. 

El trabayu foi encargáu pola Dirección Xeneral de Gobernanza Pública, Trasparencia, Participación Ciudadana y Axenda 2030, que ocupaba entos José Antonio Garmón Fidalgo, agora director xeneral d’Innovación y Cambiu Social, unos dies anantes de les caberes elleiciones y axudicáu direutamente -ensin valorar otres posibilidaes- a la Cátedra Rafael del Riego de Buen Gobierno de la Universidá d’Uviéu al traviés de la Fundación Universidá, al considerase que ye indispensable cuntar colos recursos humanos y elleváu nivel de conocimientu de la Universidá p’abordar cuestinoes tan abegoses.

Llucía F. Marqués