El Plan de Normalización recueye específicamente que los llogotipos del conceyu y les sos adaptaciones tienen de ser billingües

Iniciativa pol Asturianu ve na intención del Conceyu de Xixón d’anovar la so identidá corporativa una oportunidá pa incorporar la llingua asturiana y la toponimia oficial a la imaxe del consistoriu, cumpliendo con ello la normativa vixente. Ye la primer midida del Plan de Normalización aprobáu nel Plenu d’agostu, que recueye que «si se diere’l casu de camudar la identidá gráfica del Conceyu la imaxe corporativa y los llogotipos y toles sos adaptaciones han de ser billingües». Esta redacción foi precisamente una de les propuestes de la entidá nel Conseyu Asesor de la Llingua Asturiana. 

L’asociación cree que con una mayoría favoratible nel Plenu ye’l momentu de cuntar con un llogotipu billingüe. Nesi sen, la llexislación vixente contempla esta posibilidá. La Llei d’Usu y Promoción del Asturianu, respeuto a la toponimia, recueye que los topónimos d’Asturies van tener la denominación oficial na so forma tradicional. La entidá recuerda que’l topónimu oficial Xixón ye Gijón/Xixón.

El Plan de Normalización Llingüística de Xixón, vixente pal periodu 2024-2027, dispón tamién “la utilización del llogotipu del Conceyu n’asturianu o billingüe nes dependencies municipales nos vehículos, paneles y lletreros de víes públiques y edificios municipales, de manera que l’asturianu tea presente siempres que se camudé la identidá gráfica corporativa”. 

Iniciativa pol Asturianu invita al Conceyu de Xixón a incorporar la llingua asturiana a la imaxe corporativa, recoyendo la forma oficial ‘Conceyu de Xixón’ y l’usu xenéricu del topónimu tradicional de ‘Xixón’; calteniendo la denominación oficial na versión en castellán ‘Ayuntamiento de Gijón/Xixón’. El colectivu de reivindicación llingüística considera qu’esti usu del idioma y de la toponimia tendría un papel visibilizador y normalizador fundamental na sociedá.

Susana Sela

This work is licensed under a Creative Commons Attribution 4.0 International License.