Ya tan escosándose les entraes pal conciertu col que la formación preslla la so llarga xira de presentación del so caberu trabayu, el nueve de marzu

‘Humanes‘ ye’l caberu discu de l’Asociación de Música Tradicional Muyeres, la formación ñacida nel añu 1993 cola xunión de muyeres  vinientes de dellos grupos d’investigación etnográfica que pretendíen destacar el papel de la muyer na tradición sonora asturiana, teniendo amás l’envís de revindicar la música de percusión nel panorama musical asturianu.

Depués de seis discos asoleyaos y trenta años de llabor, presentaron en xineru del 2020 el so trabayu ‘Humanes’ nel que por primer vegada interpreten pieces de composición propia, trece cancios colos que faen homenaxe a toles muyeres anónimes que fueron faciendo historia.

Cuatro años lleva la so xira pasando pelos escenarios asturianos como’l MCC de Mieres, el Nuevu Teatru de La Felguera, el Niemeyer o’l festival Arcu Atlánticu de Xixón, pente otros y agora ponen el ramu con esti caberu conciertu’l día nueve de marzu nel mesmu escenariu qu’estrenaron la so xira, el Teatru la Llaboral de Xixón. 

Susana Sela

This work is licensed under a Creative Commons Attribution 4.0 International License.