Bonos díes, bona xente.
Alborecemos con nubes ya claros o abancios ya con dalgo de nublina. Les temperatures tan alrodiu de los 8ºC, rexistrándose nel puirtu Payares 2,9ºC.
Güei l’aire ábrigu dixebrará les nublines del alborecer y baxará la humedá, dexándonos un ascensu moderáu de les temperatures col cielu empuercáu de nubes altes que sedrán más abondoses na fastera surocidental onde nun se descarta dalguna precipitación. Al atapecer un frente atlánticu va dexanos precipitaciones al soo pasu, asina como un descensu de les temperatures, rolando l’aire a gallegu.
Mañana miércoles vamos tener intervalos nubosos entemecios ente dellos claros o abancios. L’aire sedrá gallegu con raches moderaes en puntos de llitoral y zones altes de cordelera con unes temperatures en llixeru descensu.
El xueves, vienres y sábadu mandará l’aire ábrigu ya tendremos el cielu empuercáu de nubes altes, subida de les temperatures que mos dexará un ambiente primaveral.
Que paséis un bon martes collacies ya collacios.
Semeya que mos l’apurre la nuesa collacia Mary Pandiella.
This work is licensed under a Creative Commons Attribution 4.0 International License.
