L’Executivu asturianu, lloñe de dar exemplu, recueye una tasa de temporalidá del 35’2%, qu’algama’l 43’6% ente les muyeres funcionaries

Nel cuartu trimestre de 2024, acordies la Encuesta de Población Activa, 60.000 trabayadores teníen n’Asturies un contratu temporal, lo que representa’l 16,9% de la población asalariada, superando la media española, onde la tasa ye del 15,5% y siendo muncho más alzada ente les muyeres trabayadores, onde esa tasa algama’l 20,9%, entantu que ente los homes ye ocho puntos menor, quedando nel 12,8%.

Esos datos dispárense cuando centramos nel emplegu públicu, onde la tasa de temporalidá ye del 35,2% n’Asturies, triplicando la del sector priváu (11,7). Esa tasa supera en siete puntos la media estatal, recayendo’l mayor pesu d’esti problema sobro la población femenina, onde cuasi la metá de les contrataes nel sector públicu tien contratu temporal. La temporalidá de muyeres que trabayen nel sector públicu n’Asturies (43,6%) supera con muncho la de les muyeres españoles (32,4%) y dobla la de los homes asturianos (20,9%).

La temporalidá llaboral deriva nuna situación de precariedá ya indefensión llaboral qu’imposibilita la consecución d’una necesaria estabilidá económica, siendo un de los pegoyos de la baxa natalidá n’Asturies. 

El 22 d’avientu de 2021, en reclamándo-ylo la UE, al traviés del Plan de Recuperación, Tresformamientu y Resiliencia, el Senáu español aprobare la llei que tendría d’amenorgar la temporalidá nes Alministraciones Públiques, con procesos selectivos que teníen de rematar en trés años improrrogables, ello ye, anantes del 31 d’avientu de 2024, coles mires d’amenorgar la temporalidá al ocho per cientu, colo que’l gobiernu asturianu supera en 27 puntos l’oxetivu marcáu.

El Principáu non so incumple la llei de  2021 pal amenorgamientu de la temporalidá nel emplegu públicu, sinón que nun cumple l’Estatutu Básicu del Emplegáu Públicu -que marca como plazu pa executar les ufiertes d’emplegu un másimu de trés años- nin l’alcuerdu de concertación ACEBA, asumíu nel 2008 pol Executivu asturianu p’amenorgar la temporalidá na Alministración pública al traviés de les ufiertes d’empléu públicu al 6% en 2011, bien llueñe del 35,2% actual. 

Llucía F. Marqués

This work is licensed under a Creative Commons Attribution 4.0 International License.