Iniciativa pol Asturianu presenta un escritu requiriendo’l cambéu de la señalética pa incorporar el nome tradicional del pueblu

La señalética informativa de la carretera autonómica AS-369 de la parroquia de Maeza, en Salas, incumple la toponimia oficial del conceyu. Na cartelería apaez la forma deturpada ‘Malleza’, fechu pol que dellos vecinos contactaron con Iniciativa pol Asturianu pa treslladar la vulneración de la toponimia oficial. La organización de reivindicación llingüística presentó un escritu ante la Conseyería de Fomentu, Cooperación Llocal y Prevención de Quemes requiriendo’l cambéu de la señalética pa dar cumplimientu a la Llei d’Usu y al Decretu de toponimia salense.

Nel so rexistru, l’asociación recuerda al departamentu del conseyeru Alejandro Calvo que la Llei d’Usu y Promoción del Asturianu establez que los topónimos van tener la denominación oficial na so forma tradicional. El Conseyu de Gobiernu del Principáu d’Asturies aprobó’l decretu d’oficialización de la toponimia del conceyu de Salas en setiembre de 2021, siendo únicamente oficial la forma tradicional ‘Maeza’.

La entidá reforzó la so reclamación recordando tamién que l’anuncia del mesmu decretu nel Boletín Oficial del Principáu d’Asturies insta na so disposición adicional única que “a partir de la entrada en vigor del presente decretu, les Alministraciones Públiques adecuarán de manera progresiva, d’alcuerdu coles sos disponibilidaes presupuestaries y, en tou casu, al momentu de la so renovación, les rotulaciones en víes públiques y carreteres, asina como de mapes y planos oficiales a les formas toponímiques establecíes nel presente decretu”.

Susana Sela