Alborecemos con dalgo de nubosidá estratificada na fastera central asturiana y nubes altes na metá ocidental con unes temperatures que tan alrodiu de los 8ºC, rexistrándose nel puirtu Payares 1,9ºC.
Güei dempués que se dixebren los estratos del alborecer la llume del sol calecerá l’ambiente pa dexanos un día primaveral a pesar de les nubes altes que tarán entemecies ente dellos claros o abancios.
Mañana martes l’aire ábrigu va dir coyendo puxu, empobinándonos nubosidá media-alta y un ascensu de les temperatures por mor del efeutu foehn que fae al so pasu pela cordelera onde les raches puen ser moderaes y cafiantes, nun s’esperen precipitaciones, sicasí na fastera más surocidental d’Asturies pue cayer dalguna gotera por retención.
El miércoles amenorgará l’aire ábrigu pa quedar sele ya variable, veremos más el sol y les temperatures van caltenese mui suaves con másimes que sobrepasarán los 18ºC al mediudía.
El xueves sedrá’l día más calurosu de la selmana casi podría decise que braniegu con unes temperatures másimes que van tar perriba de los 20ºC, esfrutaremos del sol y l’aire sedrá sele ya variable.
El vienres aumentará la nubosidá ya tendremos dalguna racha de vientu moderada nes zones altes de la cordelera con un descensu de les temperatures pero que nun va ser mui destacáu, calteniéndose entovía l’ambiente suave.
El sábadu una vaguada atlántica va apurrinos un frente que mos dexará precipitaciones xeneralizaes a su pasu, amás d’un descensu de les temperatures con nieve na cordelera pero solo nes cumes más altes, perriba de los 1800m.
Y el domingu paez que volveremos a esfrutar del sol, dempués d’una nueche fresca y yá a partir del mediudía les temperatures sedrán de nuevu primaverales.
Que paséis una bon llunes collacies ya collacios.
Semeya que mos l’apurre’l nuesu collaciu Pachu Armesto Hevia.
This work is licensed under a Creative Commons Attribution 4.0 International License.
