Alborecemos col cielu empuercáu de nubosidá media-alta, amás de nublines y borrionos no fonderu los valles con unes temperatures que tan alrodiu de los 7ºC, rexistrándose nel puirtu Payares 2,8ºC.
Güei vamos tener nubosidá media-alta que mos la va apurrir l’aire ábrigu que pue soplar con raches moderaes en zones altes de montaña, amás al so pasu pela cordelera provocará l’efeutu foehn faciendo que suban les temperatures con másimes que van averase a los 20ºC.
Mañana miércoles veremos dalgo más el sol y les temperatures van camudar poco, calteniéndose l’ambiente primaveral, tamién perdera puxu l’aire ábrigu pa quedar sele ya variable.
El xueves seguiremos con nubosidá media-alta y temperatures mui suaves con másimes otra vegada más alrodiu de los 20ºC, tando l’aire sele ya varible.
El vienres la llegada d’una pequeña vaguada atlántica va apurrinos un frente al finar el día, dexándonos precipitaciones xeneralizaes al so pasu, mentantu pel día l’aire ábrigu dirá coyendo puxu con raches moderaes a fuertes en zones altes ya en puntos del llitoral con temperatures suaves que baxarán al final col pasu del frente.
El sábadu dirá escamplando ya tendremos nubes ya claros o abancios con unes temperatures en descensu.
Paez que’l domingu torna l’aire ábrigu col cielu empuercáu de nubes medies y altes ya un ascensu de les temperatures.
Pa más a llargu plazu la tendencia ye a situase l’anticiclón de Les Azores nel so sitiu, favoreciendo la ondulación del chorru polar sobre nosotros con entraes de noroeste, baxada de les temperatures , precipitaciones y nevaes pela cordelera pero esto yá lu diremos viendo.
Que paséis un bon martes collacies ya collacios.
Semeya que mos l’apurre’l nuesu collacio Pachu Armesto Hevia.
This work is licensed under a Creative Commons Attribution 4.0 International License.
