La organización entama los sábados pela mañana la convocatoria telemática d’esti espaciu llibre p’avezase a usar l’idioma asturianu
Iniciativa pol Asturianu recupera los grupos informales de conversación n’asturianu en collaboración col Conseyu de la Mocedá de Xixón (CMX). La responsable de la cuenta educativa ‘Cosines de Clas’ va ser la encargada de la dinamización del grupu. La participación ye de baldre.
Con esta convocatoria preténde abrise un espaciu pa toles persones que necesiten d’un espaciu informal, relaxáu y seguru onde quitar el mieu a falar n’asturianu en públicu y nel que nun importa’l nivel d’usu o conocencia del idioma. Los grupos informales de conversación son una iniciativa del CMX col envís de que la xente pierda’l mieu a falar n’otros idiomes como’l francés, l’inglés y l’alemán. Resulta, entós, perinteresante usar estos espacios como sitios seguros onde l’asturianu medre ensin tar estigmatizáu, p’amosar que se pue falar n’asturianu en toles situaciones sociales, seya cola familia, na cai, nel supermercáu o colos collacios.
La cita va repetise tolos sábados a les diez de la mañana de manera telemática, al traviés de la plataforma Zoom. Pa facilitar el trabayu pa la organización y la comunicación, les persones interesaes han rellenar un formulariu na páxina web d’Iniciativa pol Asturianu. La primer sesión va celebrase’l sábadu 22 de febreru.
Susana Sela
This work is licensed under a Creative Commons Attribution 4.0 International License.
