Les Xornaes van cellebrase n’Uviéu del cuatro al seis de payares d’esti añu 2025 y les propuestes podrán unviase fasta’l 20 d’abril

L’Academia la Llingua asturiana vien d’abrir el plazu de presentación de propuestes de comunicaciones coles que participar nes XLIII Xornaes Internacionales d’Estudiu, l’actividá d’intercambéu de producción investigadora con más antigüedá nel ámbitu de la filoloxía asturiana y una de les que más ediciones cuenta dientro del espaciu científicu de la romanística. Celébrense na Facultá de Filosofía y Lletres de la Universidá d’Uviéu y tienen tres díes de duración. 

La so finalidá ye amosar y coneutar los estudios d’asturianística al traviés d’un programa de ponencies, comunicaciones y presentaciones que s’anueva tolos años y que, dacuando, tien un enfoque monográficu. Les Xornaes son, asina, el resultáu d’acomuñar el trabayu que tán desenvolviendo munches persones dende disciplines estremaes pero complementaries, na investigación de les lletres asturianes, seya d’un xeitu específicu o, bien, comparativu.

Les propuestes han remitise a informacion@alladixital.org, col títulu de la mesma xunto a un resume, de 200 a 300 pallabres, onde se conseñen los oxetivos, el desendolcu y unes referencies bibliográfiques. Pueden presentase dende agora hasta’l día 20 d’abril, fecha en que ta previsto presllar la receición de propuestes; anantes del mes de xunu fadráse anuncia de les comunicaciones aceutaes y el so allugamientu dientro del programa. 

Susana Sela

This work is licensed under a Creative Commons Attribution 4.0 International License.