Nel escritu nel que se refuga la solicitú especifícase “Visto que la solicidú nun foi presentada en llingua oficial, tendrá de presentar la mesma en castellán”

El solicitante remembra a la responsable de los fechos que podría tar incurriendo en delitu.

Ante’l requirimientu na Casa Conceyu de Sotu’l Barcu  d’información relativa a la situación d’una panera allugada en La Imera (Sotu’l Barcu), el solicitante recibió un escritu nel que se niega la entrada de la documentación por mor de tar escrita n’asturianu. 

Nesi escritu menciónase l’artículu 15.1 de la Llei 39/2015, na que se recueye efeutivamente que “la llingua de los procedimientos sedrá’l castellán”, continuando’l citáu artículu con que “Non ostante lo anterior, los interesaos que se dirixan a los órganos de l’Alministración Xeneral del Estáu con sede nel territoriu d’una Comunidá Autónoma podrán utilizar tamién la llingua que seya cooficial en ella.”

Sicasí, como fae notar el demandante nel escritu col que respuende a María Pilar Iglesias Salgado, secretaria/interventora del Ayuntamientu de Sotu’l Barcu, escaecen qu’ello ye aplicable únicamente nes comunicaciones pa cola Administración Xeneral del Estáu, nun siendo d’aplicación nun escritu d’ámbetu llocal. Nesi sen, la mesma llei recueye que  “Nos procedimientos tramitaos poles Alministraciones de les Comunidaes Autónomes y de les Entidaes Llocales, el usu de la llinguan axustaráse a lo previsto na llexislación autonómica correspondiente” lo que mos remite a la la Llei Orgánica 07/1981 que recueye “1. El bable gozará de protección. Se promoveráse’l so usu, el so espardimientu nos medios de comunicación y la so ensiñanza, respetando en tou casu les variantes llocales y la voluntariedá nel so aprendizaxe; 2. Una llei  del Principado regulará la protección, usu y promoción del bable” Esa llei ye la 01/1998 d’usu ya promoción del asturianu, que recueye específicamente’l drechu de los asturianos a utilizar la so llingua nes comunicaciones cola alministracion pública asturiana. 
Con ello afítase que los conceyos d’Asturies, toos, ya en representación d’ellos los funcionarios que trabayen nellos, tienen qu’almitir escritos ya comunicaciones n’asturianu de los ciudadanos ya aldeganos qu’asina lo quieran facer.

Nel casu los funcionarios públicos el reclamante considera oportuno recordar lo qu’afita’l Códigu Penal, vixente anguaño, nel so artículu 404: “A la autoridá o funcionariu públicu que, a sabiendes de la so  inxusticia, dictare una resolución arbitraria nun asuntu alministrativu castigaráse-y cola pena d’inhabilitación especial pa emplegu o cargu públicu y pal exerciciu del drechu de sufraxu pasivu por tiempu de nueve a quince años.”

Por tou ello solicita a María Pilar Iglesias Salgado, secretaria/interventora del Ayuntamientu de Sotu’l Barcu, a reconsiderar la so decisión y  almitir con  normalidá l’escritu presentau énte esi ayuntamientu.

Llucía F. Marqués

This work is licensed under a Creative Commons Attribution 4.0 International License.