El mesmu día que’l tribunal afitaba que los fechos fueron un actu de llibertá d’espresión y nun tienen de tener reproche, la titular d’otra alministración pública, concretamente la Delegada del Gobiernu n’Asturies Adriana Lastra, roblaba un resolvimientu que confirma la sanción de 601 euros a cada participante nos fechos por vulneración grave de la conocida como Llei Mordaza
L’Audiencia Provincial d’Asturies decretó’l zarru del procesu penal contra cinco activistes que realizaron una acción de desobediencia civil na fábrica d’ArcelorMittal en Veriña, Xixón, en mayu del añu pasáu. Na denuncia pidíense 3 años de cárcele contra ca activista, y 2400€ en conceutu d’indemnización.
Los cinco activistes formen parte del colectivu Rebelión o Estinción, un movimientu pola xusticia social y climática. L’acción consistió nel bloquéu d’una de les entraes a la fábrica de ArcelorMittal pa denunciar y protestar pola fin de los sosidios públicos a los combustibles fósiles. Pa ello, les activistes encadenáronse ente elles y a entrambos llaos de la carretera, torgando asina la entrada y salida de vehículos a la fábrica. Amás, diben acompañaes de pancartes con frases como “Stop subsidios fósiles” y “Arcelor Mortal”.
Énte la denuncia per parte de la empresa contratista de tresporte, los fechos fueron investigaos pol xulgáu d’instrucción y, darréu, pola Audiencia Provincial, al tar les activistes acusaes d’un delitu de coacciones pol que se-yos pidía a caúna 3 años de cárcel y un total de 2.400 € d’indemnización. Tres delles vistes xudiciales y más d’ocho meses de congoxa, finalmente dictaminóse el zarru del procesu penal y confirmóse que l’acción taba protexida pol drechu a la protesta al tratase d’un actu llícitu. Les activistes comunicaron que “Dende Rebelión o Estinción queremos espresar el nuesu mayor agradecimientu a les persones que nos sofitaron y se solidarizaron con nós. Devolvemos la nuesa solidaridá, especialmente, a les compañeres represaliaes so acusaciones similares, que viven so l’amenaza de sufrir pergraves penes por defender los drechos y llibertaes de todes, como les 6 de la Suiza, los 6 de Zaragoza o los 8 de Caixabank. Vamos volver a les cais a lluchar por elles”. Amás, manifestaron que’l sobreseimientu del casu penal “motívanos a siguir lluchando contra’l imperiu fósil capitalista” remembrando que l’añu pasáu superemos per primer vegada l’estragal de +1,5Cº al respective de la temperatura preindustrial y, magar los cumes y los alcuerdos, les emisiones siguen n’aumentu.
Anque se presllare’l procesu penal, inda siguen en marcha les denuncies impuestes pela vía alministrativa a estes cinco activistes que s’encadenaron y otres cinco compañeres que participaron na acción. Esactamente’l mesmu día que’l tribunal establecía que los fechos fueron un actu de llibertá d’espresión y nun tienen de tener reproche, la titular d’otra alministración pública, concretamente la Delegada del Gobiernu n’Asturies Adriana Lastra, roblaba un resolvimientu que confirma la sanción de 601 euros a cada participante nos fechos por vulneración grave de la conocida como Llei Mordaza.
Nel Dos Santos
This work is licensed under a Creative Commons Attribution 4.0 International License.
