@eltiempunasturies

Bonos díes, bona xente.

Alborecemos col cielu cubiertu por nubes medies y altes ya soplando l’aire ábrigu con raches fuertes en zones altes de montaña provocando l’efeutu foehn al so pasu pela cordelera con unes temperatures que tan alrodiu de los 17ºC, rexistrándose nel puirtu Payares 5,5ºC.

Güei vamos tener nubosidá media-alta empobinada pol vientu ábrigu que mos dexará temperatures mui altes durante la mañana, yá pela tarde cola rolada de vientu y la llegada d’un frente descenderán les temperatures y se xeneralizarán les precipitaciones que vendrán acompangaes de vientu racheáu intensu. La nieve pue surdir al finar el día perriba de los 1500m.

Mañana sábadu alboreceremos con nubes ya claros, tando más nuboso pela tarde cuando nun se descarta dalguna precipitación o xarabatu feble ya dispersu. Les temperatures descenderán y l’ambiente sedrá más ivernal.

El domingu vamos tener intervalos de nubes altes entemecies ente dellos claros con un ascensu de les temperatures a partir del mediudía dempués d’un alborecer frescu.

El llunes torna l’aire ábrigu pero sedrá transitoriamente porque la selmana viniente vendrá con tiente ivernales, anque los modelos meteorolóxicos nun lo tienen na nidiu paez que podríamos tener precipitaciones irregulares, nevaes pela cordelera y un descensu de les temperatures, pero esto yá lu diremos viendo.

Que paséis un bon vienres collacies ya collacios.

Semeya que mos l’apurre la nuesa collacia Consuelo Vazquez.

This work is licensed under a Creative Commons Attribution 4.0 International License.