La conversión d’edificaciones d’usu ganaderu n’aloxamientos turísticos ye un pasu más nel desaniciu de les actividaes tradicionales y la desapaición d’una cultura milenaria

“Durmir nun teitu como los antiguos brañeiros de Somiéu”. Asina s’anuncia la esperiencia turística d’esti teitu reconvertíu n’aloxamientu turísticu rural. Falamos del conxuntu de cabanes con cubierta vexetal más numberosu d’Europa ocidental, qu’aspira a ser Padremuñu de la Humanidá de la Unesco.

Por agora va ser una sola cabana, con capacidá pa 6 persones, pero la idega del alcalde somedanu, Belarmino Fernández Fervienza, y la vicepresidenta asturiana y responsable de Turismo, Gimena Llamedo, ye tresformar “cuantes más meyor” de los 300 teitos n’apartamentos turísticos. 

Cierto que ye meyor que permitir el so desbarrumbe definitivu y que los sos propietarios cargaben a títulu particular col reteitau y caltenimientu d’estes ayalgues hestóriques, ensin que Padremuñu fexere un res por ello, y cierto que nun ye desavezao topar estes cabanes vandalizaes -pol propiu turismu qu’afalamos- ya incluso utilizaes comu bañu públicu. Pero convertir un parque natural y unes edificaciones úniques nun resort turísticu da un pasu más na conversión d’Asturies nuna triba de muséu de si mesma, na que nun hai sitiu pa los asturianos de güei, si nun ye’l de guies turísticos y figurantes, cual esóticos nativos d’una colonia.

Los responsables del proyeutu prometen que nun se va perder l’usu ganaeru de les brañes y que la incursión de fasta 300 viviendes, con capacidá pa cerca de mil visitantes, nun va afeutar al entornu nin a los poblaores de la zona; sicasí les esperiencies previes de convivencia ente vida tradicional y turismu falen de conflictu d’intereses nel que la población propio aveza perder.

Al mesmu tiempu que se dan toles facilidaes pal desendolcu turísticu, les torgues continúen pa quienes quieren seguir viviendo de la ganadería: remembremos qu’esti mesmu mes se-yos robaba a los ganaeros somedanos 700 hectarées de tarrenes comuñales de pastu, desaniciando con ello tamién munchos miles d’euros n’aides PAC. 

Queremos una Asturies pa vivila, non p’alquilala per nueches. 

Llucía F. Marqués

This work is licensed under a Creative Commons Attribution 4.0 International License.