El Conceyu contra la Incineración presentare una demanda contra’l cambéu de l’autorización ambiental de la Central Térmica de La Pereda

El Conceyu contra la Incineración presentó una demanda énte la Sala del Tribunal Cimeru de Xusticia d’Asturies contra’l Resolvimientu del 1 de payares de 2023, de la Conseyería d’Industria y Transición Ecolóxica, qu’autoriza’l cambéu sustancial de l’autorización ambiental integrada (AAI) de la Central Térmica de La Pereda, permitiendo l’usu de biomasa como combustible principal y CSR como secundariu.

Pa ello alegaron importantes motivos de nulidá, entamando por que’l so incumplimientu afecta directamente a la salú pública y al mediu ambiente. Ente elles, destaquen que’l cambéu tendría de tramitase como una nueva autorización ambiental integrada ordinaria, acordies con el Reglamentu d’emisiones sobro incineración de borrafes, en llugar d’un cambéu que se tramitó conforme a un procedimientu embrivíu.

Tamién faen notar que nel procesu omítense trámites clave, como informes sobro l’estáu del suelu, en materia de borrafes y sobro el valor de la eficiencia enerxética pa cada llínea d’incineración, realizaos por un espertu esternu acreditáu. Amás, destaquen que la Declaración d’Impactu Ambiental escarez de midíes efectives de prevención, lo qu’afecta a la validez de l’autorización.

Coles mesmes, informen dende’l Conceyu contra la Incineración, la AAI incumple la Llei de Borrafes y fracciona tanto la evaluación d’impactu ambiental como l’autorización ambiental integrada, al nun contemplar la xestión de povises y escories na escombrera de Pumardongo. Tampoco se xustifica la caltenibilidá, disponibilidad, característiques nin la composición de los materiales a incinerar, lo que torga conocer la viabilidá económico y ambiental del proyectu.

Pa finar, el Conceyu contra la Incineración sostien qu’esta autorización nun cumple col oxetivu del Real Decretu Llexisllativu 1/2016 d’evitar o, cuando nun seya posible, amenorgar y controlar la contaminación y afitar sistemes de prevención y control pa protexer tanto’l mediu ambiente nel so conxuntu como la salú de la población.

Susana Sela