El Muséu de la Sidra de Nava acoyó la tarde d’ayeri la entrega de los galardones correspondientes al Campeonatu d’Echadores del añu 2024
Al actu, presentáu por Saul Moro -Presidente de l’Asociación d’escanciadores- allegaron autoridaes del mundu de la hostelería, la sidre, del Principáu y del Conceyu de Nava. Anantes de la entrega tuvo llugar una ronda d’intervenciones nes que participaron Jorge Ponte -Teniente alcalde del Conceyu de Nava-, Victor Ramos -Presidente DOP Sidra de Asturies-, Javier Martínez, -Presidente de Otea- y Marcelino Marcos, -Conseyeru de Mediu Rural y Política Agraria-.
Esti postreru aprovechó la ocasión p’anunciar, ensin concretar detalles, la puesta en marcha d’un plan tresañal de protección y promoción de la cultura de la sidra, iniciativa que va sumase a una inversión de 1,7 millones d’euros de la área de Turismu pa impulsar la escelencia gastronómica d’Asturies, na que la sidre ye una de les mayores protagonistes.
De siguío, féxose entrega del diploma correspondiente a los diez primeros clasificaos, amás del premiu especial pa la categoría Sub-25, patrocináu pola Revista LA SIDRA y como novedá, el premiu a la meyor sidrería, que recayó nesta ocasión en La Montera Picona de Ramón.
Salvador Ondó, echador en Tierra Ástur El Vascu, tuvo per sesta vegada l’honor de llucir la montera d’oru, que-y foi impuesta por Ricardo Rios, Presidente de la Bona Confrería de los Siceratores. El diploma qu’acreditaba’l so segundu puestu foi recibíu por Wilkin Aquiles, de la Sidrería la Montera Picona y na mesma sidrería quedábase’l tercer puestu, que foi pa Jorge Vargas. Hai que destacar la fuerte presencia de nuevos echadores, con cuatro participantes de la categoría Sub-25 ente los diez primeros clasificaos.
Amauris “La Pauta” (Tierra Ástur) recibió asina una doble reconocencia, per una parte el diploma d’octavu na xeneral y por otra’l premiu otorgáu pola Revista LA SIDRA al meyor escanciador de 25 o menos años, consistente en troféu, diploma personalizáu y una navaya Vitorinox esclusiva modelu Swiss decorada con motivos sidreros. Siguiéndo-y en dambes categoríes, el so compañeru Alexander Gabriel quedó segundu na Sub-25 y novenu na xeneral, ente que Isabella Padrón (Bodegues Anchón) llograba’l décimu puestu na xeneral y terceru na categoría nueva, siendo la muyer con meyores resultaos del campeonatu 2024.
La Montera Picona de Ramón, amás de tener a trés de los sos escanciadores ente los primeros puestos, recibió la reconocencia al Meyor Equipu d’Escanciadores. Tierra Ástur, amás de cuntar colos echaores que ganaron el primer puestu de les categoríes xeneral y Sub-25, asitió a trés d’ellos ente los diez iniciales, recibiendo’l segundu premiu en sidreríes, ente que la Sidrería El Portal consiguía, colos sos dos concursantes nos diez primeros puestos, el tercer premiu.
Anantes de dar per concluyida la entrega, anunciar en primicia la prósima emisión del programa ‘Copa Escanciadores’ na TPA pa la prósima temporada del Campeonatu.
Al rematar l’actu tuvo llugar una espicha na antoxana del Muséu de la Sidra, na que pudieron tastiase productos del Paraiso y sidra de Val de Boides, maxistralmente echada por dalgunos de los meyores echadores de la hestoria del Campeonatu.
Nel Dos Santos
This work is licensed under a Creative Commons Attribution 4.0 International License.
