Llucía F. Marqués

Que la miseria ye factor de riesgu pa la vida humana nun ye nuevo. Ye llabor de los nuesos ‘dirixentes’ que la miseria nun seya una constante nel díi ente díi de tantos asturianos.

Va pocu alcontraron un home, de 44 años, muertu nel trasteru onde vivía. Un espaciu de, a lo muncho, cincu metros cuadraos, ensin agua, ensin cocina, ensin bañu. Una persona viviendo, lliteralmente, como un trastu: “Cosa inútil, estropeada, vieya o qu’estorba”. Los medios de comunicación falen del so previu ‘delicáu estáu de salú’ pa xustificar la so muerte, como si ello fore atenuante de la so situación, y non agravante. 

Podemos falar d’elli o del xorreciente númberu de families de tres o más miembros que viven amontonaos nuna única habitación, en cases comparties, de la ‘tendencia’ de vivir en baxos comerciales, o mencionar que vamos camín del millar de ‘ensin techu’ (un por ca mil asturianos) que sobroviven nes nueses cais.

Per otru lláu, más de 100.000 de les cuasi 675.000 viviendes censaes n’Asturies tan vacíes. Hai conceyos nos qu’inclusu hai más cases desocupaes que con moraores y a les cases vacíes súmense les 77.600 (30.000 llargos pente Xixón y Uviéu) usaes ‘de forma esporádica’, que ye una forma discreta de dicir que son mayormente d’usu turísticu.

Nun toi cuntando na nuevo, pero si daqués que va a más; son coses que nun podemos escaecer, que nun podemos dexar de llau. La especulación, l’avaricia y l’arriquecimientu d’unos pocos ta llevando a parte de la sociedá asturiana a situaciones incaltenibles. El gobiernu d’Asturies confórmase con facer anuncies al vientu cuyos resultaos naide ve y esperar que lluevan soluciones dende Madrí. Entantu y non, muerre xente.

La probitú, mata. 

This work is licensed under a Creative Commons Attribution 4.0 International License.