Bonos díes, bona xente.
Alborecemos col cielu empuercáu de nubes altes ya con unes temperatures que tan alrodiu de los 4ºC, rexistrándose nel puirtu Payares -1,8ºC.
Güei vamos tener dalgo de nubosidá alta entemcía ente dellos claros o abancios con unes temperatures másimes n’ascensu llixeru dempués d’una nueche fría ya col aire sele de componente norte.
Mañana xueves tendremos el cielu más llimpiu de nubes con vientu nordés que pue ser cafiante nel llitoral y zones espuestes con unes temperatures que van camudar poco anque la sensación térmica sedrá menor por mor del vientu.
El vienres alboreceremos ente’l borrín y la nublina dixebrándose pela mañana pol vientu nordés que volverá a ser cafiante nel llitoral con un descensu de les temperatures. El cielu quedará con intervalos nubosos entemecios ente dellos claros o abancios.
El sábadu y domingu una masa d’aire continental dirá ganando terrén faciendo que baxen les temperatures, sobre too en zones de montaña onde pue tar xelando durante tol día nos puertos altos de la cordelera. Nel cielu tendremos dalgo de nubosidá de retención nos cordales costeros cola posibilidá de dalgo d’orpín durante’l riscar del domingu anque, en xeneral, vamos tener nubes ya claros o abancios con vientu nordés que baxará entovía más la sensación térmica.
Que paséis un bon miércoles collacies ya collacios.
This work is licensed under a Creative Commons Attribution 4.0 International License.
