L’ochu de marzu va ser la primer oportunidá pa esfrutar en direutu de Vérsica, un proyeutu artísticu que xune lliteratura, música y diseñu
Retomando en cierta midía la tradición de los ballets clásicos, Vérsica ye un cuentu -escritu por Cerezal Gonzalo Pumares- que se desendolca al traviés de diez cortes musicales, nos que la hestoria va trescurriendo de la man d’otros tantos poemes.
‘Un vieyu que yera mozu’ ye la base pa esta obra na que tan presentes poemes d’autores reconocios, como Miguel Monteavaro, Xurde Fernández, Vanessa Gutiérrez, Xabiero Cayarga, Taresa Lorences, Nené Losada o Fernán Coronas.
Marcos Álvarez ye’l responsable de la música, qu’acomuña folk acústicu, rock y pop. La grabación fíxose en dellos espacios pero, sobre manera, nos estudios Tutu de Corvera. Nella participaron artistes asturianos d’estremaos xéneros. Amás de los nomáos Marcos Álvarez y Gonzalo Pumares, formen parte d’esta obra Juan Yagüe, Álvaro Bárcena, Juan Carlos Vega, Sergio Rodríguez, Wilón DeCalle y Juanjo Díaz, quedando les voces a cargu d’Ana Belén Rodríguez, Esther Yuste, Isa R. Infiesta y Andrea Álvarez, que foi la primer cantante de Cerezal. La narración del cuentu fíxola una neña de 6 años nomada Ludara.
Toa esta obra va ver la lluz en formatu físicu endolcada nuna escultura, obra del artista Miguel G. Díaz. El sábadu 8 de marzu a les 20h nel CPI de Llugones y con entrada de baldre va ser la primer oportunidá de ver Vérsica en directo. los responsables del proyectu llenden la primer edición a namás 250 unidaes numberaes que puen acutase a traviés del bandcamp de Versica.
Susana Sela
This work is licensed under a Creative Commons Attribution 4.0 International License.
