El Xulgáu de lo Penal númberu 3 de Xixón declaró absueltos de tolos cargos a los dos trabayadores de la empresa ALSA que foren encausaos tres la so participación na füelga que tuviere llugar en dicha empresa en 2020 convocada en defensa de la salú pública y los derechos llaborales.
El 5 d’ochobre de 2020 los y les trabayadores del Grupu d’Empreses ALSA entamaben una füelga col envís de recuperar al 100% les llinies y frecuencies d’autobuses y el serviciu de taquilles, poner frenu a los numberosos despidos que taben produciéndose y facer cumplir la normativa llaboral afitada nel conveniu coleutivu, midíes que la empresa ALSA impunxere demientres la pandemia de Covid 19.
La füelga tuvo un siguimientu total de la plantiya, y les asociaciones vecinales y coleutivos sociales convocaren importantes manifestaciones de sofitu a les reivindicaciones de los y les trabayadores.
Lloñe d’atender eses reclamaciones, la emprea de tresporte denunció desperfeutos nos sos autobuses, acusando d’ello a les y los trabayadores, dos de los cualos enfrentáronse a una petición de 3 años de prisión pa caún, fechu que desencadenó una fuerte rempuesta social.
La so absolución ye un trunfu pa la clas trabayadora y un reconocimientu de los sos drechos, nidiamente vulneraos en casos comu’l de les 6 de la Suiza.
En pallabres de los dos compañeros: “La represión ye una parte más de la llucha obrera. Y podemos salir alantre. Pero nun nos tracamundiemos, tenemos de siguir peleando día a día polos nuesos drechos, porque si nun lo facemos asina, podemos perdelos toos”.
Nel Dos Santos
This work is licensed under a Creative Commons Attribution 4.0 International License.
