“Les muyeres siguimos aguantando a diariu la violencia patriarcal con acosu sesual, llaboral, violencia física, sicolóxica y financiera, violencia obstétrica, etc. A tou ello hai que sumar la violencia istitucional que nos revictimiza”

Na concentración mensual de denuncia de la violencia contra les muyeres alrodiu d’un centenar de persones d’estremaos colectivos aconceyaron al pie d’una pancarta con un númberu reondu, diez, los diez asesinatos qu’en dos meses inaguren el macabru contador ensin que se dean señales de qu’el 2025 vaiga ser l’añu nel que por fin s’erradique la violencia d’aquellos que consideren que la vida d’una persona pertenez-yos pol fechu de ser ellos homes y ella muyer.

Na intervención, qu’esti mes corrió a cargu del grupu Amamantar, destacóse la importancia de la educación nel orixe del problema “la violencia exercida contra les muyeres pol fechu de selo ye un problema de cadarma y social qu’entama dende la neñez. Los neños y neñes reciben modelos machistes de crianza, n’ocasiones violentos, que perpetúen los roles de xéneru, la desigualdá y favorecen l’exerciciu de la violencia contra les muyeres per parte de los homes, d’avezu de les sos pareyes. Ca vegada los neños empecípiense anantes nel consumu de porno, que cosifica a les muyeres y preséntales como oxetos pasivos y “fechos pal esfrute del home”. La educación sesual integral, tanto en casa como nes escueles, ye clave pa camudar la visión de los futuros homes sobro les relaciones, el sesu, el respetu y l’igualdá”, afitaron.

Los convocantes d’esta concentración, que se repite’l caberu miércoles de ca mes, son Andecha Ástur, Anticapitalistes, Amamantar, l’Asociación de Pensionistes de Xixón, l’Asociación Ecofeminista Petra Kelly d’Asturies, el Colectivu de Trabayadores, Feminismu en Llucha del CSI, la plataforma del serviciu d’ayuda a domiciliu -SAD-, Podemos y Verdes-Equo.

This work is licensed under a Creative Commons Attribution 4.0 International License.