Fiscalía abrió ya una investigación en base a les denuncies interpuestes por la Coordinadora Ecoloxista, en comprobando la esistencia de un vertideru incontroláu qu’atropaba toa clase de borrafes nes prosimidaes de la sablera de Torimbia, en Llanes

La xestión de les borrafes ye una competencia municipal, polo que la CEA denunció que’l Conceyu de Llanes omitió les sos responsabilidaes no tocante al control de los arramaos, la retirada obligatoria de los mesmos y la so derivación a un xestor autorizáu. Esta actitú, amás, ye reincidente en cuantes que sabe va tiempu de la so esistencia. L’incumplimientu d’estes obligaciones podría dar llugar a responsabilidaes penales yá que ye imperativu evitar posibles quemes forestales, n’una zona apocayá repoblada.

Esta situación riquier la inmediata adopción de les midíes oportunes per parte de les autoridaes competentes. Esti vertideru infringe el Decretu 3769/1972 pol que s’aprueba’l Reglamentu de Quemes Forestales, según la Llei de Borrafes y el so posterior Reglamentu.

Poro, solicitóse la inmediata retirada de les borrafes per parte del Conceyu de Llanes, señalizándose la zona alvirtiendo de que los arramaos illegales van ser sancionaos, daqué que dempués tien de cumplise, esto ye, han de sancionase los responsables -si ye que se-yos puede identificar- pa que nun sigan contaminando’l conceyu colos sos peligrosos arramaos.

Munchos de los numberosos vertideros clandestinos qu’hai n’Asturies presenten un evidente riesgu de quema. Suponen, amás, una agresiva fonte de contaminación del sosuelu y de les agües por cuenta de los llixiviaos que se xeneren. Recordemos qu’estes borrafes nun suelen ser solubles nin biodegradables, polo que son inertes y potencialmente inflamables. Los vertideros son, en sí mesmos, llocalizaciones que xeneren un riesgu mediuambiental. Ye por esto polo que les polítiques de prevención son fundamentales.

Susana Sela

This work is licensed under a Creative Commons Attribution 4.0 International License.