La violencia machista en cifres: 2.709 denuncies n’Asturies, de les que 658 derivaron en proteición pa les víctimes. Estadísticamente, namás una de ca diez denuncies fina en conderga, pero ello nun tien na que ver col mitu de les “denuncies falses”: el porcentaxe promediu de denuncies falses ye, acordies el Ministeriu d’Interior, del 0’0084 por cientu
Lloñe de desaniciase, la violencia machista ye cotidiana pa miles de muyeres n’Asturies, ya seya dientro’l so llar, nel trabayu o na cai. Poques son les que lo denuncien, la mayoría nun s’atreven a enfrentar el duru procesu de denuncia y xuiciu, nos que demasiaes vegaes son elles les xulgaes y culpabilizaes. La dependencia económica y emocional del agresor ye en munchos casos otru argumentu que les fae desistir d’interponer una denuncia. Pero lo que más les echa p’atrás ye la conciencia de que les tases d’enxuiciamientu y conderga de les violaciones frente a les denuncies ta mui perbaxo de les d’otros delitos contra les persones.
Entá asina, la ratio de númberu de denuncies por ca 10.000 muyeres foi de 65,3, con un total de 2.709 denuncies, de les que menos de la cuarta parte fueron retrucaes con órdenes de proteición y menos de 300 finaron en conderga pa los autores.
La razón d’esta escasa ratio de conderga ta na dificultá de demostrar suficientemente los fechos, acoyéndose los xueces a cualisquier resclavu de dubia pa declarar l’acusación “insuficientemente probada”. Los casos de denuncies falses, ye cierto, esisten y son duramente castigaes con penes d’ente seis meses y dos años; en total suponen un 0,0084% de les denuncies interpuestes, ello ye, que coles cifres de denuncies del caberu añu habría un promediu de más o menos una denuncia falsa ca cinco años.
Llucía F. Marqués
This work is licensed under a Creative Commons Attribution 4.0 International License.
