Iniciativa pol Asturianu esixe a la Conseyería de Facienda y Fondos Europeos la retramitación de la nueva marca y  llamenta que l’Executivu, sosteníu pol PSOE ya Izquierda Xunida, vuelva a obviar la presencia de la llingua asturiana nun emblema como esti.

El Boletín Oficial del Principáu d’Asturies asoleyó recién l’anuncia de l’adquisición del so distintivu ensin contemplar l’usu del idioma nuna forma billingüe o con un diseñu propiu en ca idioma. Nesi sen, Iniciativa pol Asturianu llamenta que’l rexistru nun cuente coles formes ‘Mercaos del Paraísu Natural’ n’asturianu y ‘Mercaos del Paraíso Natural’ n’eonaviego, cuestión que non solo normaliza la llingua, sinón qu’aporta un valir estra a los productos como una seña d’identidá y proximidá de los mesmos. 

Nun ye la primer vegada que’l Principáu rexistra una marca ensin versión n’asturianu. L’asociación yá alertó va un añu de l’ausencia del idioma na nueva marca ‘Artesanía de Asturias’ entamada pola mesma conseyería. La organización llamenta que l’Executivu, sosteníu pol PSOE ya Izquierda Xunida, vuelva a obviar la presencia de la llingua asturiana nun emblema como esti.

Esta situación contradiz les instrucciones qu’establecen los criterios del usu del asturianu y l’eonaviegu na Alministración autonómica aprobaes n’abril. El documentu establez que «tanto na imaxe corporativa como nes rotulaciones va mirase porque l’asturianu y, nel so ámbitu territorial, l’eonaviegu, tean na mayor igualdá xerárquica posible». Con ello queda demostrao otra vuelta que tolo que nun seya oficialidá, ye papel moyao nel respetu de los drechos de los asturfalantes.

Susana Sela

This work is licensed under a Creative Commons Attribution 4.0 International License.