L’once de marzu va entamar en Xixón el cursu entamáu pola Escuela de Sumillería de la Sidre, n’Aula de la Sidre del CIFP Hostelería y Turismu de Xixón, cuntando con auténticos especialistes de la hostelería, la sumillería y la sidre polo xeneral
Esti cursu ye una iniciativa pionera de la Escuela de Sumillería de la Sidre, de la Fundación Asturies XXI. Va Tener una duración de 20 hores y va impartise n’Aula de la Sidre del CIFP d’Hostelería y Turismu de Xixón a partir del martes 11 de marzu, los martes y los xueves n’horariu de 18 a 20 hores. Nel mesmu trataránse aspeutos técnicos, prácticos y culturales pa garantizar una conocencia integral del mundu de la sidre.
L’oxetivu ye consiguir que los alumnos llogren les debíes conocencies de la sidre y la so ellaboración, de la tastia y evaluación sensorial, desendolquen les sos competencies personales, habilítense pa certificaciones profesionales y puedan aportar a cursos avanzaos de Sumiller de Sidre nos que yá se ta trabayando.
Hai que destacar que l’acreditación como ‘Sumiller de Sidre’ -nivel básicu- va ser emitíu pola Escuela de Sumillería de la Sidre, de la Fundación Asturies XXI, fundación docente declarada d’Utilidá Pública.
L’acreditación enmárcase dientro de lo que se conoz como ‘Formación ensin reglar’, esto ye, nun ta regulada pol Ministeriu d’Educación y Formación Profesional y, poro, nun tien validez académica oficial. Agora bien, esta titulación permitirá adquirir competencies técniques tresversales, llograr certificaos y acreditar hores de formación, pudiendo ser valorada positivamente polos emplegadores en procesos de selección, siendo d’especial utilidá al nun esistir medios académicos oficiales pa consiguir esta formación.
L’oxetivu de la Escuela de Sumillería ye llograr nun futuru próximu la reconocencia d’un organismu públicu oficial, lo que permitiría que la titulación fuere homologada, con validez profesional y puntuable n’oposiciones y concursos de tresllaos.
El númberu de places nesti Cursu de Sumiller de Sidre ta llindáu a dieciocho persones y anque les places tán yá prácticamente cubiertes, ye posible apuntase tantu para les postreres disponibles como para la llista d’espera. Pa ello ye preciso unviar primeramente un corréu, a manera de solicitú, desplicando la motivación pa faer esti cursu, a la dirección adlasidregmail.com, o bien al whatsapp 652 594 983
El cursu inauguraráse’l próximu 11 de marzu a les 18 h. n’Aula de la Sidre del CIFP Escuela d’Hostelería y Turismu de Xixón, cola bienvenida a los participantes per parte de Roberto Suárez, director de dichu CIFP y la presentación del cursu al cargu de Marcos A. Fernández, presidente de la Fundación Asturies XXI.
La parte práctica del cursu va correr al cargu de Juan Luis García, Profesor del CIFP Hostelería y Turismu de Xixón, y pol sumiller Ricardo del Río.
El conteníu teórico va correr al cargu d’un equipu docente encadarmáu por espertos reconocios del mundu de la sidre, entamando cola intervención de Daniel Ruiz, Xerente de la DOP Sidre de Asturies y siguiendo pol Catedráticu de Física y Química Miguel Ángel Pereda, l’investigador Enrique Dapena, responsable del Programa de Fruticultura del SERIDA, la química y enóloga Cristina Castaño, Luis Benito García, presidente de la Cátedra de la Sidre de la Universidá d’Uviéu, el llicenciáu en Xeografía y Hestoria y espertu nel mundu de la sidre Donato X. Villoria, la llicenciada en Maxisteriu y miembru del Xuráu del Campeonatu Oficial d’Escanciadores de Asturies dende l’añu 2020, Laura Ovín, y el llagareru Juan José Tomás, de Sidre JR.
Susana Sela
This work is licensed under a Creative Commons Attribution 4.0 International License.
