Bonos díes, bona xente.
Alborecemos col cielu poco nuboso ya con unes temperatures que tan alrodiu de los 6ºC, rexistrándose nel puirtu Payares 0ºC.
Güei va dir aumentando la nubosidá a lu llargu la mañana pa dexanos la tarde nuble pero sin más consecuencies. L’aire dirá garrando puxu , situándose de componente sureste con raches moderaes pela tarde con unes temperatures que tenderán a descender.
Mañana martes l’aire rolará a componente noroeste apurriéndonos xarabatos intermitentes sobre too pela tarde anque de calter feble y el cielu va tar mui nuboso con unes temperatures que baxarán dalgo les másimes con una cota de nieve que rondará los 1600m.
El miércoles tendremos una mañana seliquina ente nubes ya claros o abancios pa dir desendolcándose les nubes y dexanos xarabatos pela tardiquina de calter feble con unes temperatures que camudarán poco o baxarán dalgo les mínimes.
A partir del xueves d’una u otra manera, anque nun hai unanimidá ente los modelos meteorolóxicos, paez que les borrasques atlántiques decidense a pasar al mediterrániu, bombeándonos veintu de componente norte que arrastra humedá del mar y una masa d’aire dalgo más fría polo que s’esperen precipitaciones abondoses, descensu de les temperatures y nevaes na cordelera perriba de los 1000m , pero esto según vayamos acercándonos diremos afinando dalgo más la previsión.
Que paséis un bon llunes collacies ya collacios.
Semeya del nuesu collaciu Aitor de Santomillao.
This work is licensed under a Creative Commons Attribution 4.0 International License.
